लिंपणगाव( प्रतिनिधी)- एस. एस. सी. बोर्ड पुणे यांच्यामार्फत घेण्यात येत असलेल्या इयत्ता दहावी मार्च 24 ची परीक्षा डॉ राजेंद्र प्रसाद विद्यालय पारगाव सुद्रिक या केंद्रात शुक्रवारी एक मार्च रोजी सुरळीत व चोख पोलीस बंदोबस्तात सुरू झाली. दरम्यान पहिल्या दिवशी मराठी विषयाचा पेपर असल्यामुळे या केंद्रावर सुसज्ज अशी बैठक व्यवस्था करण्यात आलेली असून, परीक्षार्थींना तणावमुक्त व शांततेच्या वातावरणात परीक्षेत प्रारंभ झाला अशी माहिती परीक्षा केंद्रसंचालिका श्रीमती अलकाताई दरेकर यांनी पत्रकारांशी बोलताना दिली. यावेळी अधिक माहिती देताना केंद्र संचालिका श्रीमती अलकाताई दरेकर यावेळी म्हणाल्या की, या परीक्षा केंद्रावर प्रामुख्याने सात शाळांचे विद्यार्थी परीक्षार्थी म्हणून प्रविष्ट आहेत. या सर्व शाळांचे जवळपास 311 विद्यार्थी असून त्यामध्ये श्री व्यंकनाथ विद्यालय लोणी व्यंकनाथ तर घारगाव येथील दोन आश्रम शाळा, यशवंतराव चव्हाण विद्यालय घारगाव, तुळसाई माध्यमिक विद्यालय घोटवी, वडाळी माध्यमिक विद्यालय वडाळी, आणि डॉ राजेंद्र प्रसाद विद्यालय पारगाव सुद्रिक येथील विद्यार्थ्यांचा या केंद्रावर परीक्षार्थी म्हणून समावेश आहे.

        पारगाव सुद्रिक या एसएससी केंद्रावर एस एस सी परीक्षेचा मराठी विषयाचा एक मार्च रोजी पहिलाच पेपर परीक्षार्थींनी शासन नियमाच्या अधीन राहून शांततेच्या वातावरणामध्ये पार पडला. यावेळी केंद्र संचालिका म्हणून श्रीमती अलकाताई दरेकर तर उपकेंद्र संचालक म्हणून अशोक क्षीरसागर हे या परीक्षा केंद्रावर काम पाहत आहेत. याप्रसंगी कुठलाही अनुचित प्रकार न घडता पहिल्या दिवशी परीक्षा शांततामय वातावरणात पार पडली. दरम्यान परीक्षेच्या प्रारंभी दक्षता कमिटीने देखील परीक्षा केंद्रावर परीक्षा सुरळीत पार पाडण्यासाठी यावेळी स्कूल कमिटीचे अध्यक्ष बाळासाहेब जगताप, उपाध्यक्ष जनार्दन मोटे, सदस्य दीपक तारकुंडे, दिलीप शिंदे, अण्णासाहेब रेपाळे, शहाजी मडके, शहाजी हिरवे, सरपंचपती दत्तात्रय हिरवे, सुदाम खेतमाळीस आदी  दक्षता कमिटीच्या पदाधिकाऱ्यांनी भेट दिली.

    यावेळी पोलीस कॉन्स्टेबल समीर सय्यद, होमगार्ड श्री पुराणे, हिरडे सी एम, गोरखे व्हि डी यांनी या परीक्षा केंद्रावर चोख पोलीस बंदोबस्त ठेवला आहे.