श्रीगोंदा प्रतिनिधी श्रीगोंदा तालुक्यातील उखलगाव येथे दिनांक 9 ऑगस्ट रोजी श्री उद्धव ढवळे यांच्या मातोश्री दुःखद निधनानंतर माजी मंत्री श्री बच्चू भाऊ कडू यांची सांत्वनासाठी भेट दिली व त्यानंतर येथे शेतकऱ्यांच्या मेळाव्यात आमदार बच्छू कडू यांनी सरकारवर तुफान हल्ला चढवला. "लाडकी बहीण योजना मतांसाठी काढतात, पण शेतकऱ्यांच्या जिवावर उठलेल्या प्रश्नांवर सरकार गप्प बसते. निवडणुकीपूर्वी सातबारा कोरा करणार म्हणून डंका पिटणारे मुख्यमंत्री आज का बोलत नाही ?" असा थेट सवाल त्यांनी केला. कडूंनी हल्ला चढवत सांगितले — "सरकारकडे महसूल आहे, पण ग्रामीण भागासाठी पैसा नाही. सरकारी नोकरांना वेळेवर पगार मिळतो, मग शेतकऱ्यांना हमीभाव का मिळत नाही? शेतकऱ्यांचे पीक वाया जाऊ नये, हा सरकारचा धर्म आहे, पण हे सरकार तो धर्म पाळायला तयार नाही." धर्म-जातीय विभागणीवर त्यांनी थेट वार करत सांगितले — "राम मंदिराच्या नावाने लोकांना भडकवता, पण राम नावाचा शेतकरी आत्महत्या करतो तेव्हा तुमच्या डोळ्यात पाणी येत नाही! धर्माच्या नावाखाली शेतकऱ्यांची फूट पाडून आमचा आवाज गप्प करण्याचा प्रयत्न थांबवा." हवामान बदल, उत्पादन खर्च वाढ, बाजारात दरघसरण यामुळे शेतकरी कर्जाच्या दलदलीत अडकले आहेत. आत्महत्यांचा आकडा वाढत चालला आहे. कडूंनी आव्हान दिले — "शेतकऱ्यांनो, आता एकत्र या! जाती-धर्म बाजूला ठेवा. शेतकरी उठला तर सरकार हादरलेच पाहिजे!" पोलिस यंत्रणेलाही त्यांनी इशारा दिला — "शेतकऱ्यांवर अन्यायकारक कारवाई झाली, तर लोकशाही मार्गाने पण लोखंडासारखी कठोर भूमिका घेतली जाईल. सरकारच्या दबावाखाली काम करणाऱ्यांनी सावध राहावे." कडूंनी शेवटी जाहीर केलं — "देशाला अन्न देणाऱ्या शेतकऱ्यांचा सन्मान आणि हक्क मिळवण्यासाठी आता रस्त्यावर उतरायलाच हवे. हे सरकार ऐकत नाही, आता त्यांना ऐकवावं लागेल!" यावेळी उखलगावचे विद्यमान सरपंच श्री बापूसाहेब ढवळे यांनी लाडकी बहिणीचे अर्ज बाद झालेत त्यांची तक्रार निवारण करण्यासाठी तालुका पातळीवर कक्ष स्थापन करण्यात यावा ही अपेक्षा व्यक्त केली व सर्व मान्यवरांचे आभार मानले. सूत्रसंचालन प्रा. संजय लाकुडझोडे यांनी केले. यावेळी प्रहार जिल्हाध्यक्ष श्री विनोद परदेशी, प्रहार संघटनेचे पदाधिकारी, गंगाराम दरवडे, बाळासाहेब वाळके, बाबासाहेब दरवडे व ग्रामस्थ मोठय़ा संख्येने उपस्थित होते.