लिंपणगाव (प्रतिनिधी)- श्रीगोंदा तालुक्यातील मढेवडगांव येथील प्रतिक पेट्रोल पंपाच्या संचालिका व यशस्वी उद्योजिका श्रीमती नयनतारा शिंदे यांचा जागतिक महिला दिनानिमित्त खा. डॉ. सुजय विखे पा. व तालुक्याचे आमदार बबनराव पाचपुते व डॉ. प्रतिभा पाचपुते यांच्या हस्ते सन्मान करणेत आला.श्रीमती नयनतारा शिंदे यांनी अकाली आलेल्या वैधव्याने खचून न जाता जीवनामध्ये मोठा संघर्ष करुन व प्रतिकूल परिस्थितीवर मात करुन खंबीरपणे उभ्या राहिल्या व मढेबडगांव येथे प्रतिक पेट्रोल पंपाचा व्यवसाय अतिशय यशस्वीपणे चालविला आहे. श्रीमती शिदे यांनी शेती व पंपाचा व्यवसाय करत असताना गेल्या ८-१० वर्षापासुन सामाजिक व शैक्षणिक क्षेत्रात सातत्याने योगदान दिलेले आहे. निसर्ग संवर्धन व पर्यावरण रक्षण याकरीता फळ झाडांचे वाटप करणे, गरीब व गरजू लोकांना जीवनावश्यक वस्तूंचे वाटप करणे, शालेय विद्यार्थ्यांना शालेय साहित्य व प्रोत्साहनपर बक्षिस देणे, शाळा इमारतीस आर्थिक मदत करणे याकरीता त्यांनी सातत्याने मदतीचा हात पुढे केलेला आहे. त्यांच्या संघर्षमय जीवनाची व यशस्वी वाटचालीची नोंद घेवून डॉ. विशाखा सोशल वेल्फेअर फौंडेशनच्या भारतरत्न डॉ. बाबासाहेब आंबेडकर सोशल सहीस एक्सलंस अॅवार्ड देवून गौरविण्यात आले होते. तसेच गतवर्षी मढेवडगांव ग्रामपंचायतीमार्फत महाराष्ट्र शासनाचा अहिल्यादेवी होळकर पुरस्कार देवून त्यांना सन्मानीत करणेत आले आहे.

श्रीमती शिंदे यांच्या कार्याची नोंद अहमदनगर दक्षिणचे खासदार डॉ. सुजय विखे पा. व तालुक्याचे आमदार बबनराव पाचपुते यांनी घेवून दि. १ मार्च रोजी श्रीगोंदा येथे जागतीक महिला दिनानिमित्त आयोजित केलेल्या सन्मान नारीशक्तीचा सांस्कृतिक महोत्सव २०२४ व कर्तृत्वान महिलांच्या सन्मान सोहळ्यात श्रीमती शिंदे यांना सन्मानीत करण्यात आले. यावेळी तालुक्यातील विविध क्षेत्रातील यशस्वी महिलांचा यथोचीत गौरव करण्यात आला. श्रीमती शिंदे यांच्या सन्मानाबद्दल अनेक मान्यवरांनी अभिनंदन करुन शुभेच्छा दिल्या आहेत.