By : Polticalface Team ,07-03-2024
मुंबई : एलन मस्क आता जगातील सर्वात श्रीमंत उद्योगपती राहिलेले नाहीत. ॲमेझॉनचे संस्थापक जेफ बेझोस यांनी त्यांना मागे टाकले आहे. ब्लूमबर्ग बिलियनेअर्स इंडेक्सने जगातील सर्वात श्रीमंत व्यक्तींची यादी जाहीर केली आहे. या यादीनुसार, आता ॲमेझॉन कंपनीचे मालक जेफ बेझोस जगातील सर्वात श्रीमंत व्यक्तींमध्ये पहिल्या क्रमांकावर आहेत.
टेस्लाच्या शेअर्समध्ये घसरण
टेस्ला शेअर्सच्या घसरणीमुळे मस्क यांची एकूण संपत्ती कमी झाली आहे. टेस्लाच्या शेअर्समध्ये 7 टक्क्यांहून अधिक घट झाली आहे. ब्लूमबर्ग अब्जाधीशांच्या यादीनुसार, जेफ बेझोसची एकूण संपत्ती आता 200 अब्ज डाॅलर (16.58 लाख कोटी रुपये) आहे. तर एलन मस्कची एकूण संपत्ती 198 अब्ज डाॅलर (16.41 लाख कोटी रुपये) आहे. लुई व्हिटॉन मोएट हेनेसी (LVMH) चे सीईओ बर्नार्ड अर्नॉल्ट 197 अब्ज डाॅलर (16.33 लाख कोटी रुपये) संपत्तीसह तिसऱ्या स्थानावर आहेत.
त्याचप्रमाणे मार्क झुकेरबर्ग चौथ्या क्रमांकावर आणि मायक्रोसॉफ्टचे बिल गेट्स पाचव्या स्थानावर असून त्यांची एकूण संपत्ती 150 अब्ज डॉलर्स आहे. जगातील सर्वात श्रीमंत व्यक्तींच्या यादीत स्टीव्ह बाल्मर सहाव्या, वॉरेन बफे सातव्या आणि लॅरी एलिसन आठव्या क्रमांकावर आहेत. लॅरी एलिसन यांची एकूण संपत्ती 129 अब्ज डाॅलर आहे. जगातील सर्वात श्रीमंत व्यक्तींच्या यादीत लॅरी पेज पहिल्या 9व्या तर सर्जे ब्रिन पहिल्या 10 व्या क्रमांकावर आहेत.
भारतीय अब्जाधीश पहिल्या दहामध्ये नाही.
या यादीतील पहिल्या दहामध्ये भारतातील एकाही अब्जाधीशाचा समावेश नाही. रिलायन्स इंडस्ट्रीजचे चेअरमन मुकेश अंबानी 115 अब्ज डॉलर्स ( 9.53 लाख कोटी रुपये) संपत्तीसह 11व्या स्थानावर आहेत. तर गौतम अदानी या यादीत 12 व्या क्रमांकावर आहेत. त्यांची एकूण संपत्ती 104 अब्ज डॉलर (8.62 लाख कोटी रुपये) आहे
वाचक क्रमांक :