लिंपणगाव प्रतिनिधी :     सहकार महर्षी शिवाजीराव नागवडे सहकारी साखर कारखान्याचे चेअरमन राजेंद्र दादा नागवडे यांनी 15 ऑगस्ट रोजी स्वातंत्र्य दिनानिमित्त कारखाना कार्यस्थळावर तसेच विविध शैक्षणिक संकुलामध्ये शहीद जवानांच्या धर्मपत्नी आणि माजी सैनिकांच्या शुभहस्ते ध्वजारोहण करून त्यांचा यथोचित सन्मान करण्याचा अभिनव उपक्रम राबविल्यामुळे सैनिक संघटनेत आनंदाचे वातावरण निर्माण झाले आहे. 

           15 ऑगस्ट रोजी भारतीय स्वातंत्र्य दिनानिमित्त प्रतिवर्षीप्रमाणे सहकार महर्षी शिवाजीराव नागवडे सहकारी साखर कारखाना, श्री.  छत्रपती शिवाजी महाविद्यालय, इंदिरा गांधी पॉलिटेक्निक बेलवंडी शुगर, सोनिया गांधी पॉलिटेक्निक, तुळजाभवानी सेवा प्रतिष्ठान तसेच ज्ञानदीप ग्रामीण विकास शिक्षण संस्थेच्या  व श्री.छत्रपती शिवाजी शिक्षण संस्थेच्या सर्व शाखांमध्ये मोठ्या उत्साहात व आनंदात झेंडावंदनाचा कार्यक्रम पार पडला. राजेंद्रदादा नागवडे यांनी यावर्षी सर्व ठिकाणी वीर शहीद जवानांच्या पत्नी किंवा माजी सैनिक यांच्या शुभहस्ते झेंडावंदन करून त्यांचा सन्मान करण्याचा निर्णय घेतला.  त्यानुसार सहकार महर्षी शिवाजीराव नागवडे सहकारी साखर कारखाना कार्यस्थळावर चेअरमन राजेंद्रदादा नागवडे यांच्या उपस्थितीत सेवानिवृत्त सैनिक प्रकाश चव्हाण यांच्या शुभहस्ते झेंडावंदन करण्यात आले. यावेळी उपस्थित असणाऱ्या मेजर कुंडलिक जंजिरे,  सुभाष ठोकळ, तात्यासाहेब चव्हाण, संभाजी  तरटे, बाळासाहेब लगड यांचा फेटा बांधून सत्कार करण्यात आला. संचालक लक्ष्मण रायकर, मारुती पाचपुते, अॅड. अशोक  रोडे, सामाजिक कार्यकर्ते संतोष पंदरकर, संदीप कोकाटे यांच्यासह ग्रामस्थ,  कारखान्याचे कार्यकारी संचालक प्रवीण शिंदे, सर्व खाते प्रमुख व कामगार,  प्राथमिक शाळेचे विद्यार्थी मोठ्या संख्येने उपस्थित होते.

           श्री छत्रपती शिवाजी महाविद्यालय श्रीगोंदा येथे राजेंद्र दादा नागवडे यांच्या उपस्थितीत वीरपत्नी श्रीमती मोहिनी मधुकर म्हस्के यांच्या शुभहस्ते झेंडावंदन करण्यात आले. यावेळी संचालक प्रा. सुरेश रसाळ प्राचार्य डाॅ.  सतीशचंद्र सूर्यवंशी व कॉलेजचा सर्व सेवक वृंद उपस्थित होता.  इंदिरा गांधी पॉलिटेक्निक बेलवंडी शुगर येथे सेवानिवृत्त सैनिक महादेव सखाराम पवार यांच्या शुभहस्ते झेंडावंदन करण्यात आले तर तुळजाभवानी सेवा प्रतिष्ठान श्रीगोंदा येथे वीरपत्नी श्रीमती सुरेखा हनुमंत काळे यांच्या हस्ते व जिल्हा बँकेच्या संचालिका सौ.अनुराधा नागवडे प्राचार्य अमोल नागवडे, निरीक्षक सुरेश गोलांडे व सर्व सेवकवृंद यांच्या उपस्थितीत झेंडावंदन करण्यात आले.

         त्याचप्रमाणे श्री छत्रपती शिवाजी शिक्षण संस्थेच्या व ज्ञानदीप ग्रामीण विकास शिक्षण संस्थेच्या तालुक्यातील सर्व विद्यालयांमध्ये स्थानिक सेवानिवृत्त सैनिकांच्या शुभहस्ते झेंडावंदन करून त्यांचा यथोचित सन्मान करण्यात आला. यानिमित्ताने सैनिकी जीवन व सैनिकी जीवनातील रोमांचक अनुभव विद्यार्थ्यांना ऐकण्याची संधी मिळाली. राजेंद्र दादा नागवडे यांनी राबविलेल्या या अभिनव उपक्रमाबद्दल आजी-माजी सैनिक संघटनेने अभिनंदन केले असून आभार व्यक्त केले आहेत.