सोलापूर: मुख्यमंत्री महिला सशक्तीकरण अभियानांतर्गत मुख्यमंत्री माझी लाडकी बहीण योजनेचा वचनपूर्ती सोहळ्याच्या निमित्ताने मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार हे बुधवारी (ता.२५) सोलापूरच्या दौऱ्यावर येणार आहेत. सोलापुरातील होम मैदानावर हा सोहळा होणार असून या सोहळ्यासाठी जिल्ह्यातील ४० हजार महिला लाभार्थी उपस्थित राहण्याचे नियोजन केले जात आहे.

जिल्हाधिकारी कार्यालयाच्या सभागृहात आज या सोहळ्याचा आढावा घेण्यात आला. यावेळी पोलिस आयुक्त एम. राजकुमार, मुख्य कार्यकारी अधिकारी कुलदीप जंगम, निवासी उपजिल्हाधिकारी मनीषा कुंभार, पोलिस उपायुक्त दीपाली काळे, उपजिल्हाधिकारी अंजली मरोड, उपजिल्हाधिकारी तथा भूसंपादन अधिकारी संतोष देशमुख, उपविभागीय अधिकारी सदाशिव पडदुणे, जिल्हा महिला व बाल विकास अधिकारी आर. बी. काटकर, जिल्हा परिषदेचे महिला व बाल विकास विभागाचे जिल्हा कार्यक्रम अधिकारी प्रसाद मिरकले, सहायक पोलिस उपायुक्त (वाहतूक) अशोक खिरडकर, सार्वजनिक बांधकाम विभागाचे कार्यकारी अभियंता मनोज ठाकरे, यांत्रिकी विभागाचे कार्यकारी अभियंता संतोष गुजरे, जिल्हा पुरवठा अधिकारी संतोष सरडे, तहसीलदार श्रीकांत पाटील यांच्यासह अन्य संबंधित विभागाचे अधिकारी उपस्थित होते.

 जिल्हाधिकारी आशीर्वाद म्हणाले...

या कार्यक्रमात चाळीस हजार लाभार्थी बसण्याची व्यवस्था अत्यंत चांगली करावी. मंडप कॉन्ट्रॅक्टरशी समन्वय ठेवून महिला लाभार्थी व्यवस्थित बसतील यासाठी मंडपाचे सहा सेक्शन करावेत. व्यासपीठ प्रोटोकॉलप्रमाणे व्यवस्थित राहील हे पाहावे. पाऊस आला तरी मैदानात कुठेही चिखल होणार नाही, याबाबत दक्षता घ्यावी. जिल्हा परिषद व अन्य महत्त्वाच्या विभागाने तसेच शासनाच्या महत्त्वाकांक्षी योजनांचे किमान दहा ते पंधरा स्टॉल लावण्याच्या दृष्टीने नियोजन ठेवावे.

 महत्त्वाच्या सूचना...

चारशे बसच्या पार्किंगसाठी शहर वाहतूक पोलिसांवर जबाबदारी

कार्यक्रमाच्या ठिकाणापासून जवळच असावी पार्किंगची व्यवस्था

व्यासपीठावर जाणाऱ्या महिलांना पोलिसांकडून मिळणार क्लोज पास

कार्यक्रमासाठी आलेल्या लाभार्थींची चोख व्यवस्था, पुन्हा आणलेल्या ठिकाणीच त्यांना सोडावे