लिंपणगाव (प्रतिनिधी)-- श्रीगोंदा तालुक्यातील सहकार क्षेत्रात मातब्बर घराणे समजले जाणारे नागवडे कुटुंबातील सहकार महर्षी नागवडे कारखान्याचे अध्यक्ष राजेंद्र दादा नागवडे व जिल्हा बँकेच्या संचालिका सौ अनुराधाताई नागवडे यांच्यासह हजारो कार्यकर्त्यांनी उद्धव बाळासाहेब ठाकरे पक्षामध्ये आज मुंबई येथे मोठ्या उत्साही वातावरणात मातोश्रीवर जाहीर पक्षप्रवेश केला. यावेळी शिवसेनाप्रमुख उद्धव ठाकरे व शिवसेनेचे नेते संजय राऊत यांच्या प्रमुख उपस्थितीत हा पक्षप्रवेश सोहळा हजारो कार्यकर्त्यांसमवेत पार पाडला.

      दरम्यान उपमुख्यमंत्री अजितदादा पवार यांच्या राष्ट्रवादी काँग्रेस पक्षाकडून उमेदवारीचा विचार न झाल्याने नागवडे कुटुंबाने आपल्या सदस्यत्वाचे राजीनामे सुपूर्द केले आणि महाविकास आघाडीकडे जाण्याचा निर्णय घेतला. गेल्या दोन-तीन दिवसापासून महाविकास आघाडीकडून नागवडे कुटुंबांना उमेदवारी मिळेल अशी जोरदार चर्चा जिल्ह्यात सुरू होती. साजन पाचपुते यांच्याही नावाची महाविकास आघाडी कडून चर्चा सुरू होती. परंतु सहकारातील एक अग्रगण्य नागवडे कुटुंब हे राजकारणाबरोबरच समाजकारणामध्ये नागवडे कुटुंबांचे मोठे योगदान आहे. त्यामुळे साजन भैय्या पाचपुते यांनी मनाचा मोठेपणा दाखवून महाविकास आघाडीकडून विशेषता उद्धव बाळासाहेब ठाकरे पक्षाकडून सौ अनुराधाताई नागवडे यांच्या उमेदवारीसाठी मनाचा मोठेपणा दाखवत विश्वास व्यक्त केला. त्यामुळे नागवडे कटुंबांनी देखील साजन भैय्या पाचपुते यांना धन्यवाद दिले आहेत. सकारात्मक चर्चेनंतर नागवडे कुटुंबांचा पक्षप्रवेशाचा मुहूर्त आज 23 ऑक्टोबर रोजी ठरला गेला. पक्ष प्रवेश सोहळ्याप्रसंगी नागवडे कुटुंबांसह त्यांच्या तालुक्यातील नागवडे समर्थकांनी हातामध्ये शिवबंधन बांधले. यावेळी सुनंदाताई पाचपुते याही उपस्थित होत्या. पक्षप्रवेश सोहळा झाल्यानंतर नागवडे समर्थकांनी तालुक्यात जल्लोष करत मोठा आनंद व्यक्त केला.

      दरम्यान आगामी विधानसभा निवडणुकीचे वारे वेगात वाहताना दिसत आहे त्यामध्ये श्रीगोंदा तालुक्यात एकमेकांचे पारंपारिक विरोधक पाचपुते नागवडे अशी विधानसभेच्या पार्श्वभूमीवर लढत होणार आहे. याप्रसंगी शिवसेनाप्रमुख उद्धव  ठाकरे यांनी नागवडे कुटुंबांच्या पक्षप्रवेशाबद्दल आनंद व्यक्त करत म्हणाले की; नागवडे कुटुंब हे सहकारातील अभ्यासू कुटुंब आहे. या कुटुंबांचे सहकार; कृषी; सिंचन; शिक्षण या क्षेत्रात मोठे योगदान लाभले आहे. सहकार महर्षी शिवाजीराव नागवडे बापूंच्या अथक प्रयत्नातून श्रीगोंदा तालुका हा सर्व क्षेत्रात प्रगतीपथावर दिसून येत आहे. असे सांगून ठाकरे आणखी पुढे म्हणाले की; निश्चितच नागवडें कुटुंबाच्या या पक्षप्रवेशामुळे श्रीगोंदा तालुक्यात मशाल पेटणार आहे. त्यामध्ये पाचपुते कुटुंबातील साजन भैय्या पाचपुते यांचीही मोठी ताकद नागवडेंच्या पाठीशी खंबीरपणे उभी राहणार आहे. कार्यकर्त्यांनी देखील विधानसभा निवडणूक पार पडेपर्यंत अनुराधाताई नागवडे यांच्या पाठीशी ठाम उभे राहावे; असे सांगून श्री ठाकरे पुढे म्हणाले की; राज्यात महाविकास आघाडीची सत्ता येणार आहे. सर्वसामान्य माणूस महाविकास आघाडीचे सरकार येण्याची वाट पाहत आहे. त्यामुळे श्रीगोंदा तालुक्याच्या उर्वरित विकासासाठी सौ अनुराधाताई नागवडे यांना मोठ्या मताधिक्याने निवडून द्यावे; असे आवाहन देखील शिवसेनाप्रमुख उद्धव ठाकरे व शिवसेना नेते संजय राऊत यांनी यावेळी पक्ष प्रवेश प्रसंगी कार्यकर्त्यांशी संवाद साधताना स्पष्ट केले आहे.