जेऊर प्रतिनिधी करमाळा तालुक्यातील करंजे येथे पार पडलेल्या प्रचार सभेत आमदार नारायण (आबा) पाटील यांनी भावनिक आणि थेट शब्दांत आपली भूमिका मांडली. सहकार तत्वांची जपणूक करणारा "श्री आदिनाथ साखर कारखाना" भाडे तत्वावर देण्याचा प्रकार समोर येताच त्यांनी याला तीव्र विरोध दर्शवला आणि संपूर्ण ताकदीने हा प्रस्ताव हाणून पाडल्याचे जाहीर केले.

"खाजगी व्यक्तींना सहकाराचा आत्मा कधीच कळणार नाही," असे ठाम मत व्यक्त करत त्यांनी सभासदांना भावनिक साद घातली – "कारखाना तुमचा आहे, तुमच्या हक्कांची रक्षा करण्याची वेळ आता आली आहे. संजिवनी पॅनल हा हक्काचा लढा लढण्यासाठी तयार आहे."

सभेच्या अध्यक्षस्थानी माजी सरपंच दादासाहेब सरडे होते. व्यासपीठावर कृषीभूषण नामदेवराव साबळे, अतुलभाऊ पाटील, अंकुश शिंदे, बाळासाहेब सरडे, श्रीराम सुखसे, जयद्रथ शिंदे, डॉ. पांडुरंग हजारे यांच्यासह अनेक मान्यवर उपस्थित होते.

आमदार आबा पाटील म्हणाले, “आदिनाथ कारखाना हा सभासदांचा आहे. गटबाजी संपवा, अन्यथा कारखाना अडचणीत येईल. निधी उपलब्ध करून देणे माझे काम, तुमचा विश्वास आमच्यावर ठेवा.” सभासदांनी टाळ्यांच्या कडकडाटात त्यांच्या भाषणाला प्रतिसाद दिला.

या सभेस करंजे, भालेवाडी, करमाळा, गौंडरे, निमगाव, कोळगाव यांसारख्या गावांतून आलेले हजारो सभासद उपस्थित होते. सभा उर्जित वातावरणात संपन्न झाली.

"आता हक्काची लढाई, कारखाना वाचवायचा!" – ही घोषणा सभेत अखेरपर्यंत घुमत राहिली.