श्रीगोंदा प्रतिनिधी/शफीक हवालदार श्रीगोंदा : पेडगावचे सुपुत्र युवा लेखक, कवी कृष्णा भगवान घोलप लिखित संत शेख महंमद महाराज व संत तुकाराम महाराज यांच्यावर आधारित " Two Saints One Thought..." दोन संत एक विचार या इंग्रजी पुस्तकाचा प्रकाशन सोहळा सोमवारी सावित्रीबाई फुले पुणे विद्यापीठात डॉ. तुकाराम रोंगटे, मराठी विभाग प्रमुख सावित्रीबाई फुले पुणे विद्यापीठ यांचे हस्ते व डॉ. श्रीरंजन आवटे, राज्यशास्त्र अभ्यासक व लेखक सावित्रीबाई फुले पुणे विद्यापीठ यांच्या प्रमुख उपस्थित पार पडला. सामाजिक द्वेशाच्या रस्त्यावर भिंत म्हणून उभी राहण्यात या पुस्तकाचा नक्कीच खरीचा वाटा असणार आहे; असा आशावाद आवटे यांनी व्यक्त केला. तसेच कृष्णाने फक्त या पुस्तकात दोन संप्रदायांचीच सांगड नव्हे तर विद्यापीठातील दोन विभागांची सुद्धा सांगड घालण्याचा प्रयत्न केला आहे. कारण कृष्णा इंग्रजी विभागाचा विद्यार्थी आहे आणि प्रकाशन सोहळा मराठी विभागामध्ये संपन्न झाला. असेही मान्यवरांनी मत व्यक्त केले. एकीकडे पदव्युत्तर शिक्षण नुकतंच पूर्ण होणे आणि त्याच कालावधीत स्वतःचा शोध निबंध पुस्तक रूपाने प्रकाशित करणे, हे कार्य इतर पदव्युत्तर शिक्षण घेणाऱ्या कृष्णा सारख्या इतर विद्यार्थ्यांसाठीही प्रेरणादायी ठरले आहे.

पुस्तकाविषयी:

खरंतर हे पुस्तक म्हणजे कृष्ण घोलप या एम. ए. इंग्रजीचे शिक्षण नुकतेच पूर्ण झालेल्या विद्यार्थ्यांचा शोध निबंध आहे. जो पुस्तक रूपाने त्याने प्रकाशित केला आहे. त्याच्या विभागाने त्याला तशी परवानगी दिली. शिक्षण क्षेत्र, सामाजिक क्षेत्र, पत्रकारिता क्षेत्र, अशा बहुविध क्षेत्रातील मान्यवरांच्या मार्गदर्शनातूनच कृष्णाने हे कार्य केले आहे. " संत शेख महंमद व संत तुकाराम यांच्या विशेष संदर्भाने सुफी संप्रदाय व वारकरी संप्रदायाचा तुलनात्मक अभ्यास" असा घोलप यांच्या शोधनिबंधाचा विषय होता. संत शहामुनी या संताला देखील प्रकाशझोतात आणण्याचे काम या शोधनिबंधातून केलेले आहे. कृष्णाच्या संशोधनातून एक गोष्ट त्यांनी मांडली आहे की, श्रीगोंदा तालुक्यातील पेडगाव ही संत शहामुनी यांची जन्मभूमी असण्याची दाट शक्यता आहे. त्यासाठी काही संदर्भही दिलेले आहेत. तसे पाहता सर्वच संतांचे विचार हे सारखे आणि एकच आहेत. परंतु या पुस्तकात लेखकाने विशेषतः सुफी संप्रदाय आणि वारकरी संप्रदायाच्या तुलनात्मक अभ्यासावर प्रकाश टाकला आहे. त्यासाठी संत तुकाराम आणि संत शेख महंमद या दोन समकालीन संतांचा मुख्यत्वे विचार केला आहे. पुस्तकाचे शीर्षक दोन संत एक विचार आहे. त्यातून कृष्णा लेखकाला हेच सांगायचे आहे की, संत देहरूपाने जरी वेगळे असले तरी त्यांचा विचार एकच व सारखा आहे. इथे दोन हा शब्द देहाची भिन्नता दाखवतो व ती फक्त संत तुकाराम व संत शेख महंमद यांनाच नव्हे तर, सर्वच संतांच्या बाबतीत लागू पडते की, सर्वच संत देहरूपाने जरी वेगळे असले तरी त्यांचे कार्य व विचार एकच व सारखा होता व आहे . त्यामुळे इथे देहाची भिन्नता असेल. विचारांची नाही.  कम्पॅरिटीव्ह स्टडी हा साहित्यातील एक प्रकार आहे. जो दोन साहित्य किंवा गोष्टींचा अभ्यास करताना तुलनात्मक दृष्टिकोन राखतो. या तुलनात्मक दृष्टिकोनाचा उद्देश कुठल्यातरी एका गोष्टीला श्रेष्ठत्व देणे नसून सदर दोन गोष्टींना योग्यरीत्या समजून घेणे हा असतो. एम.ए. इंग्रजीच्या अभ्यासक्रमात देखील कम्पॅरिटीव स्टडी हा विषय शिकवला जातो. त्याचेच हे फळ आहे असे म्हटल्यास वावगे ठरू नये.

यावेळी लेखक कृष्णा घोलप म्हणाले की, संत शेख महंमद महाराज व संत तुकाराम महाराज यांनी घालून दिलेली सामाजिक सलोख्याची शिकवण एकत्रितपणे या पुस्तकात मांडली असुन ती जागतिक दर्जावर नेण्याचा मानस आहे. या पुस्तक प्रकाशनाच्या वेळी विद्यापीठातील विविध विभागांचे विद्यार्थी विद्यार्थिनी उपस्थित होते. या प्रकाशन सोहळ्याच्या कार्यक्रमातून प्रेरणा घेऊन, कार्यक्रमाला उपस्थित असणाऱ्या विद्यापीठातीलच काही विद्यार्थ्यांनी कार्यक्रम स्थळीच असंच काहीतरी कार्य करण्याचा, आपले विचार, संशोधन पुस्तक रूपाने प्रकाशित करण्याचा निश्चय देखील केला. तसे त्यांनी आपल्या भाषणातून व्यासपीठावर व्यक्तही केले.