भिमसेन जाधव मो.9112131616 जन आधार न्युज पुणे/बारामती             दि. २ जून २०२५:

संजय गांधी निराधार योजना आणि श्रावणबाळ योजना या राज्य शासनाच्या महत्वाच्या योजनांतर्गत लाभार्थ्यांना आर्थिक मदत थेट बँक खात्यात (DBT प्रणाली) मिळण्याची प्रक्रिया अद्याप कार्यान्वित न झाल्यामुळे लाभार्थ्यांचे प्रचंड हाल होत आहेत. या पार्श्वभूमीवर वंचित बहुजन युवा आघाडीचे जिल्हाध्यक्ष मंगलदास निकाळजे यांनी बारामती उपविभागीय अधिकारी आणि तहसीलदार यांना निवेदन सादर करून त्वरित ही प्रक्रिया ऑनलाइन करून लाभार्थ्यांना दिलासा द्यावा, अशी मागणी केली आहे.

या निवेदनात नमूद करण्यात आले आहे की, अनेक जेष्ठ नागरिक, अपंग, विधवा, परित्यक्ता महिलांनी महिन्यांपासून या योजनांचा लाभ मिळवण्यासाठी प्रयत्न केले, मात्र बँक खात्यांशी संलग्न DBT प्रणाली अद्याप कार्यरत नसल्याने त्यांना पैसे मिळालेले नाहीत. यामुळे गरजू लाभार्थ्यांच्या जीवनावश्यक गरजा भागवणे कठीण झाले आहे.

निकाळजे यांनी सांगितले की, काही लाभार्थ्यांना औषधोपचार, किराणा व इतर दैनंदिन गरजांसाठी पैसे नसल्याने उपासमार होते आहे. प्रशासनाने वेळ न घालवता DBT प्रणाली तत्काळ कार्यान्वित करावी, अन्यथा वंचित बहुजन युवा आघाडी याविरोधात तीव्र आंदोलन उभारेल, असा इशाराही त्यांनी दिला.