बंगळुरू | प्रतिनिधी – भारताच्या युवा क्रिकेट विश्वात सध्या एकच नाव गाजत आहे – वैभव सूर्यवंशी. अवघ्या १४ वर्षांचा हा धडाडीचा फलंदाज पुन्हा एकदा चर्चेत आला आहे. इंग्लंड दौऱ्याच्या पूर्वतयारी सामन्यात त्याने अवघ्या ९० चेंडूंमध्ये १९० धावा ठोकत सर्वांचे लक्ष वेधून घेतले आहे.

बंगळुरू येथील नॅशनल क्रिकेट अकॅडमीमध्ये आयोजित सराव सामन्यात वैभवने जबरदस्त फटकेबाजी करत २० चौकार आणि १५ षटकार लगावले. त्याच्या खेळीकडे पाहता भविष्यातील सचिन किंवा धोनी असा उल्लेख क्रिकेट विश्लेषकांकडून केला जात आहे.

IPL मध्येही केली होती ऐतिहासिक कामगिरी

याआधीही आयपीएल २०२५ मध्ये राजस्थान रॉयल्सकडून खेळताना वैभवने अवघ्या १४ वर्षे २३ दिवसांच्या वयात पदार्पण करत पहिल्याच चेंडूवर षटकार ठोकला होता. त्यानंतर गुजरात टायटन्सविरुद्धच्या सामन्यात त्याने ३५ चेंडूंमध्ये शतक झळकावून सर्वांची मने जिंकली होती.

पंतप्रधानांकडून कौतुक

पाटणा विमानतळावर नुकतीच भारताचे पंतप्रधान नरेंद्र मोदी यांच्यासोबत त्याची भेट झाली. मोदींनी वैभवच्या खेळीचं भरभरून कौतुक करत, "तू भारताचं भविष्य आहेस," असे सांगितले. बिहारसारख्या राज्यातून आलेल्या या खेळाडूचा हा अभिमानास्पद क्षण होता.

आता इंग्लंड दौऱ्याकडे देशाचे लक्ष

भारताच्या अंडर-१९ संघात सलामीवीर म्हणून स्थान मिळवलेल्या वैभवकडून आता इंग्लंड दौऱ्यात सर्वांनाच मोठ्या अपेक्षा आहेत. दौऱ्याची सुरुवात २४ जूनपासून होणार असून, त्यात वैभवच्या बॅटमधून पुन्हा एकदा धावांचा वर्षाव होईल, अशी आशा क्रिकेटप्रेमींना आहे.